Turmush — Кечээ, 21-апрелде Талас шаарындагы курулуш базарында чыккан өрттүн чоо-жайы такталып жатат. Бул тууралуу ӨКМден кабарлашты.
Алдын ала маалыматтарга караганда, шаардын Оторбаев көчөсүндө жайгашкан «Мирай» курулуш материалдар дүкөнүнөн чыккан өрттү өчүрүүгө саат 15:10до 1 бөлүм тартылып, кырдаалга жараша кошумча күчтөр жөнөтүлгөн. Саат 15:30да дагы 1 бөлүм кошулуп, жалпысынан 3 бөлүм өрттү өчүрүү иштерине катышкан. Өрттүн кесепетинен болжол менен 1440 чарчы метр аянт күйүп кеткен. Бактыга жараша жабыркагандар катталган жок.
Учурда өрттүн келип чыгуу себептери такталып жатат.
Курулуш дүкөндөн тышкары бир нече кийим сатуу бутиктерине дагы өрт келген. Бирок сатуучулар товарларын өрт жеткенге чейин алып чыгып кеткенин билдиришти.
Буга чейин базардан чыккан өрттүн видео жарыяланган.