Turmush — Ош облусунун Кара-Кулжа районунун Биймырза айылынын тургуну Маматмуса Таиров дыйканчылык менен алектенип, күрүч өстүрүп келет. Аны менен Turmush басылмасынын кабарчысы маектешти.
Дыйкандын айтымында, атасы күрүч өстүрчү. Ал эми өзү бул иш менен алектенгенине 20-30 жылдын жүзү болду.
«Бул жылдар аралыгында күрүч эле өстүрбөстөн кошумча мал чарбачылыкты дагы колго алгам. Үй-бүлөмдү адал эмгек, бешене тер менен тапкан акча менен багуудамын», - деди Таиров.
Ачык булактарда атагы далайга жеткен Өзгөн күрүчүнүн чыныгы мекени Кара-Кулжадагы Тар дарыясынын жээгинде жайгашкан Сары-Камыш айылы болгон деп айтылат. Бул айылдын күрүчү Өзгөн шаарынын базарында сатылып жүргөнү үчүн гана «Өзгөн күрүчү» деп аталып калган.
Кийин Сары-Камыштагы жерди суу каптап кетип, Тар жана Кара-Кулжа дарыяларынын кошулган аймагы Учук деген тилкеге көчүрүлгөн. Учурда Учуктун күрүчү эталонго айланган. Өзгөндө да күрүч өстүрүлгөн. Бирок сапаты, даамы боюнча салыштырганда Кара-Кулжанын күрүчү жакшы экени айтылат.
«Биз Кара-Кулжа районунда дыйкан чарба мүчөлөрү болуп айыл өкмөттөн 5-6 гектар жерди ижарага алып, 10 гектарга чейинки жерге шалы эгебиз. Кыйынчылыгыбыз аз эле. Бизде өзүбүздүн техникаларыбыз бар, алар менен айдап, отоо чөптүн тамырларын кол менен алабыз. Ушул жумуштар эле бизге кыйынчылык жаратат. Суу маселеси жок, атайын дамба курганбыз. Анын негизинде жеңилдик болуп жатат. Негизинен түшүмдүүлүгү боюнча 1 гектар шалыдан жакшы эмектенсең 6 тоннадан ашык болот. Орточо болсо 4 тонна, жакшы болбой калганда 4 тоннага да жетпей калат. Ар бир иштен мээнетиңе жараша дөөлөтүн көрөсүң. Ал эми сатуу боюнча өкмөттөн жардам жок. Биз ушудан аксайбыз жана чыгымы көп, арзан сатабыз. Ушул маселебизди тиешелүү органдар карап берсе жакшы болмок. Ошондой эле быйыл солярка кымбаттагандыктан бизде кыйынчылык болуп жатат», - деди ал.
Маматмуса Таиров Россиядан арзан баада жаңы техникалар алынып келсе, сатып аларын кошумчалады.
Дыйкан быйыл өзүнө тиешелүү 2 гектар жерден күрүчтөн 8 тонна түшүм алды. 1 килограмм күрүчтү 150-170 сомдон сатууну пландап жатат. Быйыл көп киреше болоруна үмүт артып жатат. Ал эми өткөн жылы 5 жарым тоннадай түшүм жыйнап, киреше жакшы болбогонун айтты.
- Дыйкан 8 тонна күрүчтү 170 сомдон сатса, 1 млн 360 миң сом киреше табат.
Маматмуса Таиров 7 баланын — 4 уул жана 3 кыздын атасы. Эки баласы бала бакчага барса, экөө мектепте окушат. Ал эми бир уул жана бир кызы турмушта өз ордуларын табышса, бир кызы учурда чет өлкөдө эмгектенет.
